Léif LSZler,

 

Geschwënn ass et endlech esou wäit, eis Clubrees 2022 steet virun der Dier! Dëst Joer féiert eis eis Rees an d’Haaptstad vun der norditalienescher Regioun Emilia-Romagna, an zwar an déi wonnerschéi Stad Bologna. 

 

Mir fueren Freidegmoies, den 13. Mee, vum Zürecher HB mam Zuch bis op Bologna, wou mir am Hostel Combo Bologna iwwernuechten. Nees zeréck op Zürech geet et Sonndes de 15.5. am spéiden Nomëtteg.

 

Fir en spannenden Programm ass och gesuergt. Freides am Nomëtte gi mir zesummen d’Stad an den Uni-Campus entdecken an duerno maache mir eis en flotten Clubowend. Samsdes huelen mer den Zuch bis an d’Nopeschstad Modena, wou mer den bekannte Ferrari-Musée kucken ginn. Owes gi mer dann nees zu Bologna all zesumme gutt italienesch iessen. Sonndes besiche mir de MAMbo, de Museum of Modern Art Bologna, iert mer eis Owes leider nees op de Réckwee maachen mussen. Do dernierft ass awer och genuch Fräizäit, wou dir dat maache kennt, wourop der Loscht hutt.

 

An Italien gëllen bis den 30. Abrëll nach relativ strikt Covid-Mesuren, et brauch een den Covid-Check z.B. fir an den Intercityzich an och fir am Restaurant dobannen z’iessen. Méi detailléiert Infoen zu den aktuellen Covid-Mesuren fannt dir hei. Wéi eng Mesuren nom 30. Abrëll an Italien ginn, wësse mir leider nach net. Mir wäerten iech um Courant halen, wéi sech d’Situatioun an Italien entwéckelt.

 

D’Participatioun läit dëst Joer bei 100€, do sinn den Transport, den Hostel, een Nuechtiessen an déi kleng Aktivitéiten déi mir all zesumme maachen, mat abegraff.

 

Dir kennt iech vum Mëttwoch den 13.4. (18h00) bis den 20.4. (18h00) op eiser Website umellen. D’Umeldungen verlafen nom Prioritéitenprinzip aus eisen APB ausser dass d’Punkten 2 an 3 net gëllen. D’Prioritéite sinn also:

• Comitésmemberen
• Aktiv Memberen
• Passiv Memberen
• Externer

D’Plaze sinn op 35 Persounen begrenzt an bannent de Kategorien vun de Prioritéiten gelt den Prinzip vum “first come first served”. Mellt iech also séier un!

 

Wann d’Umeldungsphas eriwwer ass, kritt dir Bescheed gesot, op dir eng Platz kritt hutt. Zu deem Zäitpunkt kritt dir och d’Detailer fir d’Participatioun ze bezuelen.

 

Bei Froen kennt dir iech gär bei de Responsabelen vun der Clubrees mellen: Cedric Mulders (cedric@lsz.lu) an Kéo Oran (keo@lsz.lu). 

 

Mir freeën eis op eng flott Rees mam LSZ!

 

De Comité

 

 

Du muss dech alogge fir de Forms auszefëllen