Natierlech däerf een eis net vergiessen, den LSZ, d’Lëtzebuerger Studenten zu Zürech. Mir suergen derfir, datt d’Leit sech net esou eleng fillen, an nieft dem Schwyzerdüütsch och nach heiansdo Lëtzebuergesch ze héiere kréien. Mee wat bitt eise Club?

• sportlech Aktivitéiten (SOLA, Hochschulmeisterschaften, Swisscup,…)
• den Zürcher Bal
• e chicen Owend mat Iessen zu Zürech am Mee (SPL)
• eng Receptioun beim Ambassadeur zu Bern fir Nationalfeierdag
• Kleeserchersowend
• Grillowend mat Beerpong am Fréijoer
• Virstellung, Stee an Aweiung vun deenen neien LSZ’ler
• eng Clubrees am Fréijoer
• Stammdëscher iwwert dat ganzt Joer verdeelt
• an natierlech, wéi kann et aneschters sinn, e Schiweekend

Zousätzlech organiséiert den LSZ eemol am Joer e grousse Studenten Intercercle, de Clear-the-Bottles, wou dir är lëtzebuergesch Kolleegen aus anere Studentestied an och schwäizer Kolleegen kennt alueden a mat deenen e flotte Weekend kennt verbréngen. Vun enger Kéisfondue Freides Owes iwwert e Rallye duerch déi schéi Stad Zürech bis d’Party Samsdes Owes selwer ass fir genuch Programm gesuergt.

Den LSZ ass awer net nëmmen ee Party-Club, mee du kanns dech beim Comité och bei allméigleche Problemer mellen, mir hunn oft eng Léisung oder wësse ween der ka weider hëllefen.

Wann s de wëlls Member ginn, da muss de CHF 20.- pro Joer bezuelen an dech aweie loossen (looss dech iwwerraschen, et ass awer net esou schlëmm!). D’Memberskaarte gëtt et bei eis all Joer ab Enn Oktober no der Assemblée Générale ze kafen.

Weider Informatiounen

Den LSZ organiséiert awer net nëmme Fester, Vakanzen a Weekender, mee hëlleft selbstverständlech jidderengem dee sech fir e Studium zu Zürech interesséiert. Wann s de nach Informatioune brauchs, da schéck eis eng Email oder schreif un eis Kontaktadress:

Étudiants Luxembourgeois à Zurich
Postfach: Hauptgebäude ETH
CH-8092 Zürich
E-Mail: comite@lsz.lu
[www.lsz.lu]